Aprelin 25-də Brüsseldə Türk Əlaqələndirmə Platformasının (Turkish Connexion Platform) təşəbbüsü ilə təşkil olunmuş nahar yeməyinin fəxri qonağı Azərbaycan Respublikası Dövlət Neft Şirkətinin Belçika nümayəndəliyinin direktoru Vüsal Məmmədov idi. Türk Əlaqələndirmə Platforması Brüsseldə qərarlaşmış və türk peşəkarlarını bir araya gətirən müstəqil təşkilatdır.

Vüsal Məmmədov tədbir iştirakçılarına təmsil etdiyi qurum haqda ətraflı məlumat verdikdən sonra Azərbaycan enerji daşıyıcılarının Avropaya nəqli layihələrindən, xüsusilə də Trans-Anadolu və Trans-Adriatik Boru Kəməri layihələrindən (TANAP və TAP) danışıb.

Cənab Məmmədovun bildirdiyinə görə, "Şahdəniz-2" yatağından hasil olunan qazın Avropaya nəqli meqa layihədir və özü ilə nəhəng imkanlar gətirir. Yataq 1,2 trilyon kub metr qaz ehtiyatı ilə dünyada ən böyük qaz mənbələrindən biridir. Layihələrin yekununda Avropaya ildə 10 milyard kub metr, Türkiyəyə isə 6 milyard kub metr qaz ixrac etmək mümkün olacaq. İlk çatdırılma 2018-ci ildə Gürcüstan və Türkiyəyə, növbəti ildə isə Avropaya olacaq. Həyata keçirilməkdə olan layihələri dünyanın ən yenilikçi və mürəkkəb layihələri sırasına qoyan Vüsal Məmmədov boru kəmərlərinin trayektoriyası və gələcək genişlənmə potensialı haqda ətraflı məlumat verib.

Natiq Azərbaycan qazının Avropaya çatdırılmasının strateji əhəmiyyətini bir neçə faktorla izah edib: ilkin olaraq Avropanın enerji təhlükəsizliyi, o cümlədən enerji qiymətləri baxımından Şahdəniz qazı Avropa ölkələri üçün optimal variantdır. Bundan əlavə, təmiz enerjiyə keçid Avropa İttifaqının qarşısına qoyduğu məqsədlər sırasındadır. Yüksək enerji qiymətlərini Şimali Amerikadan planlaşdırılan qaz idxalı aşağı salmayacaq. Siyasi və iqtisadi məqsədlər uzlaşdığı üçün layihənin gerçəkləşməsi imkanları da maksimaldır.