Mərkəzi Gömrük Hospitalının endokrinoloqu Dr.Şəbnəm Əlirzayeva “Həkim məsləhəti” rubrikasında “Orucun insan orqanizminə faydaları” mövzusunda ətraflı məlumat verib.

Bütün dünya müsəlmanlarının sevdyi Ramazan hammız üçün mənəvi kamilliyin nəfs üzərində qələbəsi deməkdir. Ramazan ayı insanlara öz iradəsini, dözümünü yoxlamaq imkanı verir, onları təmiz vicdanlı, insaflı olmağa yönəldir və bütün bunlar orucla ifadə olunur. Bu ayda bütün müsəlmanlar imkansızlara əl tutur, qocalara, yaşlılara yardım edirlər.

İslamın təməl ibadətlərindən biri də orucdur. Onun insan orqanizminə heç bir zərəri yoxdur. Əksinə, öd kisəsi, bağırsaqlar, böyrəklər və qaraciyər orqanları üçün sağlamlıq baxımından çox faydalıdır. Oruc bir il ərzində dayanmadan işləyən mədə ilə birgə bütün həzm sisteminin və insan bədəninin dincəlməsinə kömək edir. Bədəndə olan yağların yanmasını sürətləndirir, əmələ gəlmiş piy hüceyrələrini hərəkətə gətirir. Zehni qabiliyyəti möhkəmləndirir. Bədəni stress, aclıq kimi çətin şəraitə qarşı gücləndirir. Dərini canlandırır və parlaqlıq verir, immun sistemini möhkəmləndirir. Oruc tutmaq xərçəng və alsheymer xəstəliyinin qarşısını alır, ürəyi qoruyur, 2-ci tip diabet riskini azaldır, hüceyrələri yeniləyir.

Ramazan ayı oruc tutanlar üçün qidalanma və həyat tərzinin dəyişdiyi bir aydır. Qidalanma saatları kəskin dəyişdiyinə görə orqanizmdə bəzi dəyişikliklər yaranır. Orucluq zamanı iftar və imsak yeməkləri mütləq yeyilməlidir. Səhər imsak vaxtı yemək yemədən yalnız su içmək zərərdir. İmsakda yavaş sorulan, qan şəkərini yavaş yüksəldən və qida dəyəri yüksək olan, tox saxlayan yeməklərə üstünlük verilməlidir: süd, qatıq, pendir, yumurta, kəpəkli çörək, xiyar, pomidordan hazırlanmış salat və meyvələr yemək faydalıdır. İmsakdan ən azı yarım saat sonra yatmaq olar.

İftarda qan şəkəri çox aşağı düşdüyü üçün qısa zamanda çox miqdarda qida qəbul etmək olmaz, boş mədəni anidən yükləməyin. Bu səbədən iftar 2 hissəyə bölünərək edilir. İftarı 1-2 stəkan su və 1 ədəd quru xurma ilə açaraq yüngül bir kasa şorba və bir dilim kəpəkli çörəklə başlamaq olar. 10-15 dəqiqədən sonra az yağlı ət yeməyi, tərəvəz yeməyi və ya salatla davam edə bilərsiniz. İftardan 1-2 saat sonra açıq havada qısa məsafəli yürüş həzmə kömək edəcək.

Mədə-bağırsaq xəstəlikləri, xüsusilə mədə xorası, qastriti olanlara, ürəyin işemik xəstəliyindən, yüksək arterial təzyiqdən əziyyət çəkənlərə, onkoloji xəstələrə, ağır şəkərli diabet xəstələrinə, hamilə və süd verən qadınlara, oruc tutduğu təqdirdə xəstəliyinin artacağından ehtiyat edənlərə, uzaq səfərə çıxanlara, yaşlı şəxslərə, çox ağır iş şəraitində çalışanlara, yetkinlik yaşına çatmayan uşaqlara oruc tutmaq məsləhət deyil.