Azərbaycan Dövlət Neft Şirkətinin (ARDNŞ) birinci vitse-prezidenti Xoşbəxt Yusifzadə Bakıda səfərdə olan «Emerson» şirkətinin (ABŞ) nümayəndə heyəti ilə görüşüb.

«APA-Economics»in ARDNŞ-a istinadən verdiyi məlumata görə, görüşdə ARDNŞ və «Emerson» şirkəti arasında əməkdaşlıq məsələlərinin gələcək perspektivləri müzakirə olunub. X.Yusifzadə Azərbaycanda neftçıxarma işinin zəngin tarixə malik olduğunu, dünyada sənaye üsulu ilə ilk neft quyusunun Bakıda qazıldığını, neftçilərin dünya neft sənayesinə çoxsaylı töhfələr verdiklərini söyləyib, hələ Sovet dövründə onlar tərəfindən Xəzər dənizinin müxtəlif milli sektorlarında yerləşən böyük neft-qaz yataqlarının kəşf olunduğunu, keçmiş SSRİ-nin bir çox yerlərində neft sənayesinin əsası qoyulduğunu diqqətə çatdırıb. 20 illik fasilədən sonra ilk dəfə olaraq, ARDNŞ-in öz gücü ilə «Ümid» perspektivli strukturunun işlənməsini həyata keçirdiyini qeyd edən X.Yusifzadə istər təhlükəsizlik texnikası və əməyin mühafizəsi, istərsə də işçilərin sosial-məişət problemlərinin həlli baxımından yüksək effektivliyə nail olunduğunu vurğulayıb.

Öz növbəsində «Emerson» şirkətinin qlobal satış və layihələr üzrə prezidenti Tom Sned və şirkətin regional direktoru Həmid Cəfəri şirkətin istehsalatın avtomatlaşdırılması bazarında aparıcı rola malik olduğunu qeyd ediblər. Bildirilib ki, «Emerson» sənayedə rəqəmsal texnologiyaların tətbiqinə görə digər avtomatlaşdırma vasitələri istehsalçılarından daha çox təcrübəyə malikdir. Görüşdə qeyd olunub ki, hazırda dünyanın müxtəlif ölkələrində 135 min işçi ilə fəaliyyət göstərən «Emerson» şirkəti Azərbaycanda yerli kadrların hazırlanması işlərini də həyata keçirməkdə maraqlıdır.

www.apa.az