Ötən gün “Atəşgah” Sığorta Şirkəti, “Azərpoçt” MMC, “AzRe Təkrarsığorta” Şirkəti və Azərbaycan Beynəlxalq Avtomobil Daşıyıcıları Assosiasiyasının (ABADA) rəhbər heyətlərinin iştirakı ilə  görüş baş tutub. Görüşün gündəmində yeni yaranan “Avtomobillə yük daşıyıcılarının mülki məsuliyyəti” sığorta məhsulu, sözügedən şirkətlər arasında əməkdaşlıq imkanları müzakirə olunub. Belə ki, “Atəşgah” Sığorta Şirkəti və AzRe təkrarsığorta Şirkəti ilə birgə yaradılmış bu sığorta məhsulunun yaxın vaxtlarda müştərilərin istifadəsinə verilməsi planlaşdırıldığı açıqlanıb. 

Bu sığorta məhsulu quru yolu ilə həyata keçirilən beynəlxalq daşımalara şamil olunur. Transport zamanı yükün itməsinə, məhv olmasına, yaxud korlanmasına görə sığortalı daşıyıcının yükgöndərən və ya alıcı qarşısında olan mülki məsuliyyətini sığorta təminatı altına alır. Sığorta təminatı daşıyıcının yükü yükgöndərəndən təhvil aldığı zamandan qüvvəyə minir, alıcıya təhvil verdikdən sonra qüvvədən düşür.

Sığortalılar əlavə sığorta haqqı ödəməklə digər mülki məsuliyyətlərə görə də təminatlar əldə edə bilərlər:

• Yükün yanlış ünvana çatdırılması nəticəsində yaranmış maddi ziyana görə mülki məsuliyyət; 

• Yükün daşınması zamanı daşınan yükün/konteynerin sәbәb olduğu üçüncü şәxslәrin hәyatına, sağlamlığına, әmlakına, o cümlәdәn әtraf mühitә dәymiş ziyana görә mülki məsuliyyət

Xidmətin əlçatanlığının təmin olunması və prosesin asanlaşdırılması məqsədilə “Azərpoçt” MMC bu sığorta paketinin bütün nəzarət-keçid məntəqələrində təqdim olunmasını təşkil edir. TIR sürücüləri və sahibkarlar uzağa getmədən, gömrük-sərhəd buraxılışlarında yerləşən “Azərpoçt” məntəqələrində və digər “Azərpoçt” şöbələrində “Avtomobillə yük daşıyıcılarının mülki məsuliyyəti” sığorta xidmətindən faydalana bilərlər.

Sığorta bazarında çox ehtiyac duyulan bu məhsul ilə tezliklə sığortalanmaq mümkün olacaqdır. Məhsul haqda əlavə məlumat üçün 940 çağrı mərkəzi və a@z.com elektron ünvanına müraciət edə bilərsiniz.