19 mart 2024-cü il tarixində Azərbaycan Banklar Assosiasiyasının (ABA) nəzdində fəaliyyət göstərən “Ödəniş sistemləri və rəqəmsal bankçılıq üzrə Ekspert Qrupu”nun növbəti iclası keçirilmişdir.

İclas zamanı rəqəmsal ödəniş ekosistemi sahəsində qanunvericilik bazasında aparılan islahatlar, statistik hesabatlığın təkmilləşdirilməsi, elektron ticarət şəbəkəsi üzərindən həyata keçirilən ödəniş əməliyyatları, həmçinin təsərrüfat subyektlərinin kateqoriya kodlarının (MCC code) müəyyən edilməsi və tətbiqi üzrə atılacaq addımlar müzakirə edilmişdir.

Ekspertlər tərəfindən həmçinin, ödəniş kartları ilə ölkə daxilində aparılan ödəniş əməliyyatları üzrə məlumat təhlükəsizliyinin təmin edilməsi sahəsində qanunvericilik tələbi bir daha qeyd edilərək ümumi yanaşmanın tətbiqi diqqətdə saxlanılmışdır.

Əlavə edək ki, Azərbaycan Banklar Assosiasiyası (ABA) 1990-cı ildə kommersiya bankları tərəfindən təsis edilib. ABA-nın əsas məqsədi üzv-təşkilatların maraqlarını qorumaq, onların müxtəlif növ işgüzar xidmətlərə olan ehtiyaclarının ödənilməsinə dəstək göstərmək və fəaliyyətlərini əlaqələndirməkdən ibarətdir. Hazırda, 23 bank və 2 qeyri-bank kredit təşkilatı, 4 digər təşkilat olmaqla, ümumilikdə 29 təşkilat ABA-nın üzvüdür.