Baki, Finance Time.  “PAŞA Həyat Sığorta” ASC-nin Gəncə şəhərində yerləşən “Qərb” filialı fəaliyyətə başlayıb.

İctimaiyyətlə Əlaqələr Xidmətinin verdiyi məlumata görə, şirkətin ilk filialı sayılan “Qərb” filialı Gəncə şəhəri, Atatürk prospekti 261 ünvanında yerləşir.

Yeni filialda baş ofisdə olduğu kimi həyat sığortası üzrə bütün xidmətlər, icbari və könlüllü həyat sığortası məhsulları, o cümlədən istehsalatda bədbəxt hadisələrdən icbari sığorta, həyatın müddətli sığortası, yığım tərkibli yaşam sığortası, sağalmaz xəstəliklərdən sığorta və digər könüllü  həyat sığortası məhsullarının satışı həyata keçirilir.

Sığorta xidmətləri ilə yanaşı, filial eyni zamanda həyat sığortası məhsullarının tanıdılması istiqamətində bölgədə maarifləndirmə işləri də həyata keçirmək niyyətindədir.

“Qərb” filialının fəaliyyətə başlaması qərb bölgəsində yaşayan sakinlərin sığorta xidmətlərindən istifadəsini, eləcə də bu xidmətlərdənyararlanmasını daha da asanlaşdıracaq.

Qeyd edək ki, hazırda inkişaf strategiyasına müvafiq olaraq, “PAŞA Həyat” ölkənin regionlarında biznes fəaliyyətini genişləndirir. 

Xatırladaq ki, “PAŞA Holding” Şirkətlər Qrupunun üzvü olan “PAŞA Həyat Sığorta” ASC 2011-ci ilin fevral ayının 14-dən fəaliyyət göstərir. Cari ilin may ayının 1-nə şirkətin nizamnamə kapitalının həcmi 40,250 mln. manat təşkil edir.