Baki, Finance Time. “PAŞA Həyat Sığorta” ASC potensial müşərilərinin rahatlığını nəzərə alaraq, öz rəsmi veb-səhifəsində (www.pasha-life.az) həyatın yaşam sığortası növü üzrə on-line müraciət bölməsini yaradıb.

Şirkətin İctimaiyyətlə Əlaqələr Xidmətindən verilən məlumata görə, potensial müştərilər həyatın yaşam sığortası növü üzrə on-line müraciət bölməsində xüsusi xanalara müəyyən məbləği daxil etməklə öz sığorta haqları və sığorta məbləğlərini on-line hesablamaq imkanı əldə edirlər.

Hesablamanın nəticəsi olaraq, müştəri bu məhsula qoşulmaqla bağlı şirkətə sorğu da göndərə bilər. Göndərilən sorğu müvafiq qiymətləndirmədən keçdikdən sonra şirkət əməkdaşı sorğu göndərənlə dərhal əlaqə saxlayır və müştəri ilə müvafiq sığorta müqaviləsi bağlanılır.  

Qeyd edək ki, “PAŞA Həyat”ın rəsmi veb-səhifəsində belə bir xidmətin yaradılmasında əsas məqsəd əhalini sözügedən məhsul barəsində maarifləndirməklə yanaşı, eyni zamanda potensial müştərilərin vaxtlarına qənaət etməklə məhsuldan yararlanmağın əlçatanlığını tez bir zamanda təmin etməkdir.

Xatırladaq ki, “Həyatın yaşam sığortası” sığorta olunanın sığorta müqaviləsinin qüvvədə olduğu müddətdə sığorta olunanın öldüyü, yaxud sığorta müqaviləsində müəyyən edilmiş yaşa, müddətə qədər yaşadığı halda sığorta ödənişinin həyata keçirilməsini nəzərdə tutan sığorta məhsuludur.

“PAŞA Holding” şirkətlər qrupunun ən gənc və uğurlu üzvlərindən biri olan “PAŞA Həyat Sığorta” ASC 2011-ci il fevral ayının 14-dən fəaliyyət göstərir. Cari ilin 9 ayı üzrə şirkət yığımlarının (24,498 mln.manat), həmçinin nizamnaə kapitalının (22,500 mln. manat) həcminə görə Azərbaycanın həyat sığortası bazarının lideridir. Hazırda şirkət müştərilərə istehsalatda bədbəxt hadisələrdən icbari sığorta, həyatın müddətli sığortası, yığım tərkibli yaşam sığortası, hətta sağalmaz xəstəliklərdən sığorta və digər könüllü  həyat sığortası məhsulları təklif  edir.