Bu il “Brent”, “Dubai” və WTI markalı neftin bir barelinin orta nominal qiyməti 105 dollar, 2014-cü ildə isə 104 dollar təşkil edəcək.

“APA-Economics”in məlumatına görə, bu proqnoz Dünya Bankın hesabatında göstərilir.

Dünya Bankı bundan əvvəlki hesabatında 2013-cü ildə neftin bir barelinin qiymətinin 102 dollar təşkil edəcəyini qeyd edib. Ötən il isə bankın proqnozu 105 dollar təşkil edib.

Hesabatda deyilir ki, hazırda proqnozun yenidən artmasını gözləmək mümkündür. Çünki Yaxın Şərqdəki münaqişə neft istehsalçıları olan ölkələrə qədər genişlənir və neftin Hörmüz boğazından nəql edilməsi məsələsində problemlərin yaranacağı gözlənilir.

Dünya Bankı xatırladıb ki, 2013-cü ilin ikinci rübündə neftin qiyməti düşüb və bir barelin qiyməti 100 dollardan da az təşkil edib. Lakin Misir və Suriyadakı geosiyasi vəziyyətin, həmçinin Liviyadan neftin nəql olunmasında yaranan kəsintilər, Rusiya ilə Belarus arasındakı soyuq münasibətlər neftin qiymətinə birbaşa təsir edib.

Dünya Bankının proqnozuna görə, 2014-cü ildə neftin gündəlik tələbatı 1,1 mln. barel, 2013-cü ildə isə 0,9 mln. barel artacaq: “OPEC-in üzvü olmayan ölkələrdə neftin hasilatı artırılacaq”. 

www.apa.az