Beynəlxalq Neft və Qaz Hasilatçıları Assosiasiyasının (OGP) Brisben şəhərində (Avstraliya) keçirilmiş sonuncu İllik Baş Yığıncağında BP-nin Azərbaycan, Gürcüstan və Türkiyə üzrə regional prezidenti Qordon Birrell OGP-nin İdarə Komitəsinin sədri seçilib.
«BP-Azerbaijan» şirkətindən «APA-Economics»ə verilən məlumata görə, OGP-nin üzvləri sırasına dünyanın aparıcı açıq səhmdar, özəl və dövlət neft və qaz şirkətləri, neft və qaz assosiasiyaları, kəşfiyyat və hasilat sahəsində xidmət göstərən iri şirkətlər daxildir. Dünya neftinin yarısından çoxu və təxminən dünyadakı qazın 1/3-i OGP üzvləri tərəfindən hasil edilir.
Ötən dörd il ərzində BP şirkətini OGP-nin İdarə Komitəsində təmsil edən Q.Birrell 2012-ci ildə BP şirkətinin Azərbaycan, Gürcüstan və Türkiyə üzrə regional prezidenti vəzifəsinə təyin edilib. Buna qədər isə neft və qaz sənayesinin kəşfiyyat və hasilat (Upstream) seqmentində 25 ildən artıq bir dövrdə dənizdə və quruda yerləşən sahələrdə əməyin təhlükəsizliyinin, əməliyyat risklərinin və hasilatın idarə olunması üzrə bir sıra yüksək vəzifələrdə çalışıb.
OGP-dəki yeni vəzifəsi haqqında şərh verərkən, Q.Birrell neft və qaz sənayesinin kəşfiyyat və hasilat seqmentinin növbəti onilliklər ərzində dünyanın artmaqda olan enerji tələbatının təhlükəsiz və ətraf mühitə qarşı məsuliyyətli şəkildə ödənilməsinə yardım etmək cavabdehliyini vurğulayıb: «2040-cı ilə qədər dünya əhalisinin 7 mlrd.-dan 9 mlrd.-a qədər artacağını nəzərə alaraq, bizim 35% əlavə enerjiyə ehtiyacımız olacaq ki, bunun da xeyli hissəsi İqtisadi Əməkdaşlıq və İnkişaf Təşkilatı üzvü olmayan ölkələrdə elektrik enerjisi və nəqliyyat üçün tələbatın ödənilməsinə lazım olacaq. Həmin vaxt, bərpa olunan enerji mənbələri və nüvə enerjisi sahəsinin də inkişaf edəcəyinə baxmayaraq, neft dünyada ən mühüm yanacaq növü olmaqda davam edəcək və təbii qaz isə kömürü üstələyərək dünyada ikinci ən mühüm enerji mənbəyinə çevriləcək».
Q.Birrell dünyada kifayət qədər neft-qaz ehtiyatının olduğunu bildirib: «Xoşbəxtlikdən, dünyadakı tələbatı ödəmək və gözləntiləri təmin etmək üçün həm quruda, həm də dənizdə yerləşən yataqlarda kifayət qədər neft və qaz ehtiyatları mövcuddur. OGP-nin vəzifəsi əməyin təhlükəsizliyinə və davamlı inkişafa xüsusi diqqət yetirməklə, kəşfiyyat və hasilatın cəmiyyətin mənafeyinə xidmət göstərməsinə yardım etməkdir».
Q.Birrell öz sələfi, «ExxonMobil» şirkətini təmsil edən Bred Korsonun fəaliyyətini də təqdir edib. İdarə komitəsinin yeni seçilmiş sədr müavinləri İan MakDonald («Chevron») və Mişel Konti («Total») də Q.Birrell ilə birgə fəaliyyət göstərəcəklər.
Beynəlxalq Neft və Qaz Hasilatçıları Assosiasiyası (OGP) neft və qaz sənayesinin kəşfiyyat və hasilat sahəsini beynəlxalq tənzimləyici qurumlar və qanunverici orqanlar qarşısında təmsil edir. Baş qərargahı Londonda yerləşən OGP sənayeni Beynəlxalq Dəniz Təşkilatı və Davamlı İnkişaf üzrə Komissiya kimi BMT qurumlarında təmsil edir. OGP həmçinin Dünya Bankı və Beynəlxalq Standartlaşdırma Təşkilatı (ISO) ilə də əməkdaşlıq edir. O, həmçinin OSPAR, Helsinki Komissiyası və Barselona Konvensiyasının daxil olduğu bir sıra regional qurumlara akkreditə olunub.
www.apa.az
