Mərkəzi Gömrük Hospitalının Cərrahiyyə və orqan transplantasiyası şöbəsinin cərrah-transplantoloqu, m.r.c.s., Dr. Kamran Beydullayev Özbəkistanın paytaxtı Daşkənd şəhərində türk dünyasının dahi oğlu Heydər Əliyevin anadan olmasının 100-cü ildönümünə həsr olunmuş "Özbəkistan-Azərbaycan Səhiyyə Dekadası" tədbirində iştirak edib. 

Tədbir çərçivəsində Azərbaycan Səhiyyə Nazirliyinin həkim mütəxəssisləri özbəkistanlı həmkarları ilə birgə vətəndaşlar üçün mərhələli şəkildə yüksək texnoloji avadanlıqlar vasitəsilə 100-dən artıq cərrahiyyə əməliyyatları icra edib, müayinə və müalicələr aparıblar. Mərkəzi Gömrük Hospitalının Cərrahiyyə və orqan transplantasiyası şöbəsinin cərrah-transplantoloqu, m.r.c.s., Dr. Kamran Beydullayev və nefroloq Elnur Fərəcov 10 gün müddətində Özbəkistanın tibb müəssisəsində 7 böyrək transplantasiyası və laparoskopik üsulla donor əməliyyatı icra ediblər, eləcə də  Dr.Kamran Beydullayev laparoskopik donor əməliyyatı üzrə özbəkistanlı həmkarları üçün master-klass keçirib.

Tədbir çərçivəsində Özbəkistanda cərrahi əməliyyatlar icra edən, müayinə və müalicələr aparan Azərbaycan mütəxəssisləri Azərbaycan Respublikası Səhiyyə naziri Teymur Musayev və Özbəkistanın səhiyyə naziri Amrillo İnoyatov tərəfindən yüksək qiymətləndirilib və onlara təşəkkürnamələr təqdim edilib.  

Özbəkistan-Azərbaycan Səhiyyə Dekadasının keçirilməsinin məqsədi hər iki ölkənin səhiyyə və tibb elmi sahəsində əldə olunan nailiyyətlər, tətbiq edilən innovasiyalar, səhiyyənin rəqəmsallaşdırılması, əhalinin sağlamlığının qorunması sahəsində görülən işlərin müzakirəsi və iki ölkənin həkim mütəxəssisləri arasında təcrübə mübadiləsi aparmaq olub.