“Həkimlərimizi tanıyın!” rubrikamızda Sizə Mərkəzi Gömrük Hospitalının Reanimasiya və Anesteziologiya şöbəsinin anestezioloq-reanimatoloqu, ağır xəstələrə xüsusi qayğı və diqqətlə yanaşan yüksəkixtisaslı anestezioloq-reanimatoloq Xəyal Məmmədovu təqdim edirik.
DR.XƏYAL MƏMMƏDOV Mərkəzi Gömrük Hospitalında cərrahi əməliyyatlar önü pasiyentlərin ümumi vəziyyətinin qiymətləndirilməsi, anestezioloji taktikanın seçilməsi və aparılması, əməliyyat zamanı pasiyentlərin nəzarətdə saxlanılması, əməliyyatdan sonra intensiv müalicə və müayinə taktikasının seçilməsi və aparılması, əməliyyatdan sonra ağrısızlaşdırma və regional anesteziya prosedurlarını həyata keçirir. Həkim barədə daha ətraflı məlumat almaq üçün bu linkə daxil ola bilərsiniz: https://customshospital.az/xayal-mammadov/#
Xəyal həkim 1996-cı ildə Azərbaycan Tibb Universitetinin Müalicə-profilaktika fakültəsini bitirdikdən sonra 1996-1997-ci illərdə ATU-da anestezioloq-reanimatoloq ixtisası üzrə internatura təhsili almışdır. O, 1997-2019-cu illərdə Azərbaycan Respublikası Müdafiə Nazirliyinin Baş Hərbi Klinik Hospitalında Təxirəsalınmaz Yardım və Anesteziologiya-Reanimasiya şöbəsinin həkim ordinatoru kimi başlamış, sonra şöbə rəisi təyin edilmişdir. 2013-2019-cu illərdə Azərbaycan Respublikası Silahlı Qüvvələrdə Baş anestezioloq-reanimatoloq kimi çalışmışdır. Xəyal həkim 2019-cu ildən Mərkəzi Gömrük Hospitalında Reanimasiya və intensiv terapiya şöbəsində anestezioloq-reanimatoloq kimi fəaliyyət göstərir.
Dr.Xəyal Məmmədov özünə qarşı tələbkardır, daim öz üzərində çalışan, dünya mətbuatında qabaqcıl ölkələrin səhiyyə sisteminin və tibbin ən son nailiyyətlərini izləyən və bu təcrübədən bəhrələnən yüksəkixtisaslı həkimdir. O, 2015-ci ildə Almaniyanın Unna Nevroloji klinikasında nevrologiya üzrə intensiv terapiya kursunda, 2017-ci ildə Almaniyanın Berlin şəhərində Bundeswehrkrankenhaus Şarite klinikasının təhsil bazasında Anesteziologiya-reanimatologiya üzrə ixtisasartırma kursunda, 2019-cu ildə Bakıda ATU-nun və Türkiyənin Ankara Universitetinin təşəbbüsü ilə keçirilmiş “Pediatrik reanimasiya və təcili pediatrik yardım” üzrə təlim kursunda və 2019-cu ildə Türkiyənin Florence Nightingale Xəstəxanalar Qrupunda təkmilləşdirmə kursunda iştirak edib. Dr.Xəyal Məmmədov 2016-cı ildən Azərbaycan Reanimatologiya və Anesteziologiya Cəmiyyətinin üzvüdür.
