Dövlət Gömrük Komitəsinin Tibbi Xidmət İdarəsinin Sanitar-Karantin Xidməti və Səhiyyə Nazirliyinin Respublika Sanitariya-Karantin Mərkəzi ilə birgə təlim keçirilib.

Son günlər İranda Krım-Konqo hemorragik qızdırmasına yoluxma halları təsdiqlənmişdir. Bununla bağlı bu xəstəliyin Azərbaycan Respublikasında yayılmasının qarşısının alınması məqsədilə ölkə ərazisində Səhiyyə Nazirliyi bir sıra tədbirlər keçirir. Dövlət sərhədinə isə sanitariya nəzarəti Dövlət Gömrük Komitəsi tərəfindən həyata keçirilərək bu sahədə müvafiq qurumlarla sıx əməkdaşlıq edilir. 

Həyata keçirilən əks-epidemik tədbirlər sırasında Dövlət Gömrük Komitəsi Tibbi Xidmət İdarəsinin Sanitar-Karantin Xidmətinin baş müfəttişləri və Səhiyyə Nazirliyinin Respublika Sanitariya-Karantin Mərkəzinin epidemioloqları ilə birlikdə gömrük sərhəd buraxılış məntəqələrində Krım-Konqo hemorragik qızdırmasının geniş yayıldığı ölkələrdən gələn şəxslər üzərində tibbi nəzarətin gücləndirilməsinə dair təlimlər keçirilib.

Təlim zamanı DGK Tibbi Xidmət İdarəsi tərəfindən hazırlanan "Xüsusi Təhlükəli İnfeksiyalara qarşı əks-epidemik tədbirlərə dair Təlimat"da əks olunan Krım-Konqo hemorragik qızdırmasına aid materialların gömrük əməkdaşlarına çatdırılması, əks-epidemik tədbirlərin həyata keçirilməsi və digər qurumlarla qarşılıqlı məlumat mübadiləsi məsələsinə xüsusi diqqət yetirilmişdir.

Maarifləndirici tədbirlərin davamlı olaraq gömrük sərhəd buraxılış məntəqələrində həyata keçirilməsi nəzərdə tutulur.