Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev üzvü olan milli ekspert qrupu tərəfindən ölkəmizdə ətraf mühit amillərin uşaq sağlamlığına təsir məsələlərinə dair elmi qiymətləndirmə aparılıb. 26 iyul 2023-cü il tarixində bu qiymətləndirmənin nəticələri, o cümlədən müvafiq problemlərin potensial həlli yollarını müzakirə etmək üçün BMT Uşaq Fondunun (UNICEF) dəstəyi ilə geniş tərkibli dəyirmi masa təşkil olunub. 

Tədbirdə Dövlət Gömrük Komitəsi Tibbi Xidmət İdarəsinin rəisi, tibb xidməti general-mayoru, t.ü.f.d., əməkdar həkim Ceyhun Məmmədov, Səhiyyə Nazirinin müavini İlqar Qasımov, UNICEF-in Azərbaycan nümayəndəliyinin rəhbəri Aleks Haykens, Milli Məclisin Səhiyyə Komitəsinin üzvü İlham Məmmədov və müxtəlif dövlət qurumlarının vəzifəli nümayəndələri iştirak ediblər.

Dr. İsmayıl Əfəndiyev dəyirmi masa iştirakçılarına qurğuşun, kadmium, civə və digər ağır metalların, yüksək toksikli pestisitlərin, asbestin, təhlükəli tullantıların və havanın çirklənməsinin uşaq sağlamlığına təsirinə dair geniş məlumat verib, və problemlərin aradan qaldırılması üçün konkret təkliflər vermişdir.

Sonra aparılmış təhlilərin nəticələri (əsas ekoloji problemlər, səhiyyə sisteminin təhlili, uşaqların ətraf mühit təhlükələrinə məruz qalması, havanın çirklənməsi və s.) ilə bağlı dəyirmi masa iştirakçıları arasında müzakirələr keçirilmişdir.

Mərkəzi Gömrük Hospitalında hər zaman uşaqların sağlamlığına böyük diqqət göstərilir, UNİCEF və digər beynəlxalq təşkilatlarla bu istiqamətdə əməkdaşlığın genişləndirilməsi nəzərdə tutulur.