Mərkəzi Gömrük Hospitalının pediatr-neonatoloq-reanimatoloqu Aygün Sadıxovanın ailəsində böyük sevinc yaşanır. Belə ki, Aygün həkimin oğlu Sadıq Sadıxlı Sinqapurda  və Londonda keçiriləcək beynəlxalq olimpiadalara dəvət alıb. 

Hər şey ötən il noyabr ayının 30-da Bakıda keçirilən Amerika Riyaziyyat Olimpiadası olimpiadasından başlamışdı.  Bakı Avropa liseyinin şagirdi Sadıq Sadıxlı bu olimpiadada yüksək nəticə göstərərək,  qızıl medal qazanmışdı. Qeyd edək ki, dünyanın 30-dan çox ölkəsindən uşaqların qatıldığı bu bilik yarışında uğur qazanan şagirdlər bir çox beynəlxalq olimpiadalarda iştirak etmək hüququ qazanır. Sadıq da yüksək nəticə göstərdiyinə görə bu il 22-25 iyul 2023-cü il tarixlərində Sinqapurda keçiriləcək  “Simoc” olimpiadasına vəsiqə alanlar sırasındadır. 

Eyni zamanda Sadıq Kembric Universitetinin təsis etdiyi İMEC olimpiadasında da qızıl medal qazandığına görə 6-13 avqust 2023-cü ildə Kembric Universitetinin təşkilatçılığı ilə Londonun Harrou Universitetində keçiriləcək final yarışlarına dəvət alıb. 

 İndi ailə o günləri ümidlə gözləyir. Əminik ki, bu bilik yarışlarında da Sadıq yüksək nəticə əldə edəcək. Sadığa uğurlar diləyir, qızıl medalla Vətənə dönməyi arzulayırıq. Qoy bu uğurlar Sadığın gələcəkdə dünyanın ən nüfuzlu universitetlərindən birində təhsil almağa bir körpü olsun!