Azərbaycan Respublikası Elm və Təhsil Nazirliyinin dəstəyilə Code Academy tərəfindən 2021-ci ildən etibarən icra olunan #CodeForFuture layihəsi Rəqəmsal İnkişaf və Nəqliyyat Nazirliyinin Technest təqaüd proqramı çərçivəsində 2022-ci ildən daha da genişlənərək, regionlarda həyata keçirilməyə başladı.
2022-2023-cu tədris ilinin yaz semestrində Gəncə Dövlət Universitetində təhsil alan 66 tələbənin iştirakı ilə #codeforfuture layihəsinin məzun günü keçirildi.
Tədbirdə açılış nitqi ilə çıxış edən Code Academy tədris müəssisəsinin təsisçisi və direktoru Ülvi Aslanov layihənin regionlarda genişlənməsi, GDU tələbələrinin gələcək həyat və karyeralarındakı əhəmiyyəti haqqında məlumat vermiş, İnnovasiya və Rəqəmsal İnkişaf Agentliyinin rəqəmsal təhsil layihələri üzrə keyfiyyətə nəzarət, monitorinq və qiymətləndirmə üzrə məsul şəxsi İbrahim Qədirov yüksək nəticə ilə tədrisi bitirən məzunları təbrik edərək, diplomlarını təqdim ediblər.
Layihənin ilk ilində, Proqramlaşdırma və IT help-desk sahəsi üzrə təhsil alan 66 tələbə tədrisi uğurla bitirib, yekunda hazırladıqları final layihələri ilə praktiki bacarıqlarını inkişaf etdirərək, həm də ilk peşəkar portfoliolarını formalaşdırıblar. Tələbələrdən 21 nəfər beynəlxalq sertifikat imtahanlarında uğurla iştirak edərək, ümumilikdə 28 ədəd CompTIA sertifikatını əldə ediblər.
#CodeForFuture layihəsində təhsil alan hər bir tələbə aşağıdakı əsas üstünlüklərə sahib olurlar:
- Təhsil aldığı universitetin məzunu olaraq diplomun alınması
- Code Academy-də təhsilini təsdiqləyən diplom/sertifikat
- Layihə işləri əsasında ilk peşəkar portfolionun formalaşması
- Beynəlxalq sertifikat qazanaraq, iş həyatına rahatlıqla başlama imkanı.
Elm və Təhsil Nazirliyinin dəstəyi və Rəqəmsal İnkişaf və Nəqliyyat Nazirliyinin təşəbbüsü ilə regionlarda icrası həyata keçirilən #codeforfuture layihəsindən bu günə qədər 1344 tələbə faydalanıb. İlkin olaraq AzTU-da başlanan, BDU, AzMİU, SDU, GDU, LDU təhsil müəssisələrində davam edən layihənin daha çox sayda tələbənin faydalanması və gələcək mütəxəssislərin yetişdirilməsi məqsədilə növbəti tədris illərində də genişləndirilməsi nəzərdə tutulur.
Layihə haqqında ətraflı məlumatla https://forfuture.code.edu.az/ saytına keçid edərək tanış ola bilərsiniz.
