Baki, FinanceTime. Beynəlxalq Əmək Təşkilatı (BƏT) və Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) birgə təşkilatçılığı “Azərbaycanda Effektiv İşəgötürənlər Təşkilatı” mövzusunda keçirilən dörd günlük təlim başa çatıb.

Beynəlxalq Əmək Təşkilatının Beynəlxalq Tədris Mərkəzində işəgötürənlərin fəaliyyət proqramları üzrə meneceri   Xorxe İllinqvort və BƏT-in Moskva Bürosunun işəgötürənlərin fəaliyyəti üzrə baş mütəxəssisi Vladimir Çuroviç tərəfində keçirilən təlim kursunda üzvlüyün inkişaf etdirilməsi, üzvlərə keyfiyyətli və davamlı xidmətlərin təqdim olunması, daxili və xarici kommunikasiyanın səmərəli idarə olunması, daha yaxşı iş mühiti üçün lobbiçilik və üzvlərin hüquqlarının müdafiə edilməsi kimi məsələlər əhatə olunub.

İşəgötürənlər birlikləri və biznes assosiasiyalar üçün nəzərdə tutulan təlimdə Azərbaycan Respublikası Sahibkarlar (İşəgötürənlər) Təşkilatları Milli Konfederasiyası, Azərbaycan Banklar Assosiasiyası (ABA), Azərbaycan Mikromaliyyə Assosiasiyası (AMFA), “Azərbaycan Sahibkar Qadınlar” İctimai Birliyi, Azərbaycan Tikinti Materiallarının İstehsalı və İxracı Assosiasiyası, Azərbaycan Qablaşdırma Sənayesi Assosiasiyası, “Əlil Sahibkarlar Təşkilatı” İctimai Birliyi, “Gənc Mühasiblər” İctimai Birliyi, Azərbaycan İdarəetmə Assosiasiyası, Azərbaycanda Qadın Sahibkarlığının İnkişafı Assosiasiyası, “Memarlıq, İnşaat və Dizayn” İctimai Birliyinin nümayəndələri iştirak ediblər.

Təlimçinin video müsahibəsini buradan izləyə bilərsiniz. (Titrların ekrana gəlməsi üçün youtube-da lazımi funksiyanı işə salın)