Baki, FinanceTime. Azərbaycan Respublikasının milli iqtisadiyyat perspektivi üzrə Strateji Yol Xəritəsinə əsasən qadın sahibkarların işgüzar əlaqələrinin möhkəmlənməsi, həmçinin Türkiyə-Azərbaycan qadınlarının işgüzar əlaqələrinin genişləndirilməsi məqsədilə dövlət siyasətinin davamı olaraq Azərbaycanda ilk dəfə Business Women Summit Azerbaijan həyata keçirilib.
Türkiyədə tanınmış aparıcı, yazar ve iş qadını Ece Vahapoğlunun moderatoruluğu ilə təşkil olunan tədbirdə millət vəkili Qənirə Paşayeva, Azərbaycan-Türkiyə İş Qadınları Dərnəyinin sədri Vəfa Muradzadə, Sahibkar Qadınlar İctimai Birliyinin sədri Zemfira Ağayeva, Azərbaycan Qadın Sahibkarlığının İnkişafı Asossiasiyası (AQSİA) idarə heyətinin sədri Səkinə Babayeva, Azərbaycan Türk Qadınlar Birliyinin rəhbəri Tənzilə Rüstəmxanlı və digər iş xanımları iştirak edib.
“Business Women Summit Azerbaijan 2018” layihəsi “Turkaz” jurnalının təşəbbüsü, “Azərbaycan-Türkiyə İş Qadınları Dərnəyi”nin baş sponsorluğu və qadın sahibkarlığın inkişafı üçün sərfəli kredit şərtləri ilə bank sektorunda fərqlənən Rabitə bankın sponsorluğu, Vəfa ev tekstili, Türkiyənin idman geyim markası Fit21 və digər iş xanımlarının dəstəyi, o cümələdən TurkAz PR&EVENT ve Azərbaycandakı rəsmi partnyoru PROAKTİV PR şirkətinin təşkilatçılığı ilə baş tutub. Layihə ASK, ATİB, AQSİA, TÜİB tərəfindən də dəstəklənib.
Layihədə iş həyatında qadına dəstək siyasəti, qadının iş həyatındakı yeri, müxtəlif sektorlarda qadınların önəmi, qadınların təşəbbüskarlığı, iş dünyasında markaların tanınması və dğru PR strategiyası qurmanın önəmi, Azərbaycan və Türkiyədəki iş qadınlarının ortaq sərmayəsi ilə inkişaf etdirilə biləcək bizneslər və s. mövzular ətrafında müzakirələr edilib.
Qeyd edək ki, TurkAz jurnalının qurucusu ve baş redaktoru Yeganə Quliyevadır. TurkAz jurnalı Türkiyədə ilk Azərbaycan yayını olaraq 1 ildir təsis olunub və Azərbaycan-Türkiyə işgüzar əlaqələrin genişləndirilməsinə dəstək, Azərbaycan mədəniyyəti, tarixi, adət-ənənələri və s. barədə Türkiyə mətbuatında daha geniş məlumat verilməsi məqsədi daşıyır.
