Baki, FinanceTime. Azərbaycan Anti-Korrupsiya Akademiyası (AZAKA) tərəfindən Korrupsiyaya qarşı mübarizə üzrə Komissiya və ASAN Təlim-Tədris Mərkəzinin dəstəyi ilə regionlarda dövlət qulluqçuları üçün silsilə təlimlər keçirilib.

2018-ci ilin yanvar ayında Masallı, Bərdə, Qəbələ, Quba və Sabirabad rayonlarında keçirilən təlimlərdə 120-dən çox dövlət qulluqçusu iştirak edib və əsas mövzu “Etik davranış və korrupsiyaya qarşı mübarizə texnikaları” olub.

Təlimlər çərçivəsində iştirakçılara düzgün dövlət idarəçiliyi, etik davranış qaydaları, səmərəli xidmət mədəniyyətinin əsas şərtləri, ölkəmizdə korrupsiyaya qarşı mübarizə sahəsində həyata keçirilən institusional və qanunvericilik islahatları, o cümlədən korrupsiyaya qarşı mübarizə texnikaları: şəffaflıq, ictimai nəzarət, hüquqi maarifləndirmə, onlayn və real mübarizə metodları barədə seminarlar keçirilib. İştirakçılar qruplar formasında korrupsiyanın qarşısının alınması üzrə keyslərdə aktiv iştirak edib və təqdimatlar ediblər.

Qeyd edək ki, AZAKA tərəfindən 2018-ci ildə dövlət qulluqçuları, hüquq mühafizə orqanlarının əməkdaşları, ədliyyə qulluqçuları, özəl sektorun nümayəndələri, tələbələr və digər hədəf qruplar üçün 47 təlim, korrupsiyaya qarşı mübarizə sahəsində ixtisaslaşmış peşəkarların iştirakı ilə 5 “Şəffaf Forum”, korrupsiya və ona qarşı mübarizə ilə bağlı 7 kino klub, teatr səhnəciyi, rəsm sərgilərin keçirilməsi nəzərdə tutulur.

Bundan başqa AZAKA tərəfindən ilk dəfə olaraq ölkəmizdə “Beynəlxalq Şəffaflıq” təşkilatının “Beynəlxalq Korrupsiya Barometri” əsasında Milli Korrupsiya Barometeri hazırlanıb və 2500 vətəndaş arasında sorğu keçirilib. Sorğunun nəticələri 2018-ci ilin fevral ayında açıqlanacaqdır.

AZAKA-nın fəaliyyəti ilə daha ətraflı tanış olmaq üçün bizi sosial şəbəkələrdən izləyə bilərsiniz: 1. https://www.facebook.com/academy.az/ 2. https://www.instagram.com/azacademy_/