Baki, FinanceTime. “Mədəniyyət.AZ” jurnalının növbəti sayı yenə də rəngarəng və maraqlı yazılarla dəyərli oxucuların görüşünə gəlib. Dərgi həmişəki kimi, Mədəniyyət və Turizm Nazirliyinin rəsmi həyatını əks etdirən məlumatlar və Prezident sərəncamı ilə açılır.
Suveren dövlətimizin şanlı atributları - Konstitusiya və Bayraq günlərinə həsr olunmuş “Müstəqil dövlətin hüquqi bazası” və “Üçrəngli bayrağınla məsud yaşa!” məqalələri “Tarix” bölümündə yer alıb. “Azərbaycan Bayrağı” şeiri isə səhifənin bədii yükünü xeyli artırır.
Ədəbiyyat, söz xiridarlarından ötrü bu sayımızda da kifayət qədər material var. Unudulmaz şairimiz Səməd Vurğunun həyat və fəaliyyətini canlandıran “Əsərlər və övladlar yadigar qoyan şair”, əvvəli ötən sayımızda işıq üzü görmüş “Turan Cavidin son söhbəti”, vaxtilə balacalar üçün “Əlifba”dan sonra ikinci dərslik sayılan “Göyərçin” dərgisinin baş redaktoru, məşhur şair Tofiq Mahmud haqqındakı “Uşaq dünyasının yorulmaz səyyahı” bu qəbildəndir.
Jurnalın bu dəfəki sayının “Teatr” bölümünün əsas məqaləsi Mədəniyyət və Turizm Nazirliyi, Azərbaycan Milli Elmlər Akademiyası və Teatr Xadimləri İttifaqının təşkilatçılığı ilə uğurla baş tutan IV Beynəlxalq Teatr Konfransının işinin hərtərəfli işıqlandırılmasına həsr edilib.
“Ramiz Fətəliyev – 70, yaxud yaxşı ssenari müəllifinin azərbaycanlı olmasının “qəribəliyi” yubileyi və “Şöhrət” ordeni ilə təltifatı münasibətilə görkəmli kino xadimimizlə geniş müsahibədir. Tanınmış ssenarist ömrünün yetmişinci dolayından geri boylanaraq xatirələrini, kino sənəti haqqındakı düşüncələrini bölüşür...
Bütün bunlardan başqa “Rəngkarlıq”da rəssam Namiq Məmmədovun “xoşbəxtlik formulu”, “Abidələrimiz”də İtaliyada reallaşdırılan arxeoloji turizm üzrə Aralıq dənizi yarmarkası, “Ənənə”də Göyçayda keçirilən Nar bayramı və digər qeydlərlə də tanış ola bilərsiz.
“Bakı turistlərin gözü ilə” yazısında isə son vaxtlar gündən-günə inkişaf edən, lakin bununla yanaşı, qədimliyini, milli koloritini də qoruyub saxlamağı bacaran paytaxtımızın dünyanın nəzərini cəlb edən məkanları barədə danışılır.
“Elm” bölümündə isə gənc alimlərin, tədqiqatçıların müxtəlif mövzulu məqalələri, araşdırmaları öz əksini tapıb.
İnanırıq ki, “Mədəniyyət,AZ” jurnalının bu sayı da diqqətli və tələbkar oxucuların böyük sevgisi ilə qarşılanacaq və stolüstü oxu vasitəsinə çevriləcək.