Bu gün "Azərbaycan Dəmir Yolları" QSC-də Almaniyanın "DB Engineering & Consulting and Deutsche Bahn" şirkətinin Şərqi, Mərkəzi Avropa və Rusiya üzrə icraçı direktoru Filip Tentropun rəhbərlik etdiyi nümayəndə heyəti ilə görüş keçirilib.
QSC-nin Mətbuat Katibliyindən APA-ya verilən məlumata görə, qurumun sədri Cavid Qurbanov görüşdə həyata keçirilən islahatlar, reallaşdırılan layihələr və qarşıda duran vəzifələr haqqında ətraflı məlumat verib.
Görüşdə “Azərbaycan Dəmir Yolları” ilə tanışlıq, Bakı-Böyük Kəsik istiqamətində QSC-nin infrastruktur və nəqliyyat vasitələrinin yenilənməsi planları, strateji əməkdaşlıq imkanları müzakirə olunub.
F. Tentrop “Azərbaycan Dəmir Yolları” QSC-də bütün sahələrdə həyata keçirilən genişmiqyaslı islahatlardan məmnun qaldığını, strateji əməkdaşlıq imkanlarının artırılmasının zəruri olduğunu bildirib.
Qeyd edək ki, görüşdə ikitərəfli əməkdaşlığın bundan sonra daha da genişləndirilməsi qərara alınıb.
www.apa.az