Baki, Finance Time. Azərbaycanın onlayn ödəmələr bazarının böyük şirkətlərindən olan GoldenPay ASC Hesab.az protalının yeni vizual görünüşünü təqdim etdi. Bu gündən etibarən istifadəçilər portalı yeni dizaynda istifadə edəcək.
Park İnn otelində keçirilən mətbuat konfransı portalın təqdimat video çarxı ilə başlayıb. Portalın təqdimat video çarxında Hesab.az-ın yeni əsas konsepsiyası olan “Vaxtınıza dəyər verin” mesajı ön plana çəkilib. Video çarxın rejissoru Emil Quliyev çıxışında uzun zamandır Hesab.az istifadəçisi olduğunu və Hesab.az-ın yeni konsepsiyasının təqdimat videosunun hazırlanması ilə bağlı təklifi məmnuniyyətlə qəbul etdiyini bildirib.
Mətbuat konfransında şirkətin rəhbəri Fərid İsmayılzadə Hesab.az-ın yeni stili ilə bağlı jurnalistlərə ətraflı məlumat verərək, portalın qarşıdakı hədəflərini açıqlayıb:
“Hər zaman inanmışam ki, insan texnologiyanın edə biləcəyi işlərə görə vaxt itirməməlidir. Əgər texnologiyadan istifadə edərək, hər hansı ödəniş aparmaq və ya xidməti almaq üçün 10-15 saniyə kifayət edirsə, niyə buna saatlarla vaxt itirilməli, enerji sərf edilməlidir?! Elə bu ideyanın əsasında biz 2011-ci ildə Hesab.az portalını yaratdıq. Bizim üçün heç vaxt şirkətin kommersiya maraqları üstün olmayıb. Bizim əsas məqsədimiz insanların vaxtlarına qənaət edərək onu daha səmərəli keçirmələri və ailələrinə, sevdiklərinə daha çox vaxt ayırmalarıdır. Elə ilk video çarxımızda da məhz ailə mövzusu önə çəkdik. Qarşıda yeni video çarxların çəkilişi də nəzərdə tutulub. Yeni video çarxlarda isə Hesab.az-dan istifadə etməklə qənaət edilən vaxtın necə daha səmərəli dəyərləndirməyin mümkünlüyünü nümayiş etdirəcəyik”.
F. İsmayılzadə il ərzində Hesab.az-ı tamamilə yenilənəcəyini deyib: “Hesab.az-ın yalnız görüntüsünü deyil, həm də texnoloji imkanlarını yeniləyəcəyik. Demək olar ki, bu istiqamətdə görülən işlərin yarısı tamamlanıb. Növbəti ildə isə biz onlayn xidmətlərimizin sayını artırmağı planlaşdırırıq. Hesab.az istifadəçiləri aviabilet daxil olmaqla, alış-veriş etmək imkanına qədər bir çox xidmətləri bir məkandan əldə edə biləcəklər”.
Fərid İsmayılzadə mətbuat konfransında yeni istifadəyə verilmiş lite.hesab.az USSD sistemini də təqdim etdi. O bildirib ki, bu sistem interet olmadan Bakcell və Nar abunəçilərinə hesab.az-dan istifadə etmək imkanı verir: "lite.hesab.az-da qeydiyyatdan keçmiş Bakcell və Nar abunəçiləri *713# yığmaqla USSD menudən isitfadə edərək rahat şəkildə ödənişlərini edə bilərlər".
Portalın yeni dizaynını hazırlayan “SAFAROFF Creative Agency” şirkətinin qurucusu Çingiz Səfərov GoldenPay-lə işləməkdən məmnun olduğunu bildirib: “GoldenPay müasir və yenilikçi şirkətdir. Bu şirkət üçün insanların vaxtına qənaət etməsi əsas amil olduğundan işimizdə bunu nəzərə almışıq. Hesab.az brendinin yeni stilini də məhz bu amili əsas tutaraq hazırlamışıq”.
Hesab.az haqqında
GoldenPay şirkətinə məxsus 215 mindən çox istifadəçisi olan Hesab.az, 100-dən çox xidmət növünə bank kartları vasitəsi ilə ödənişləri təqdim edən portaldır. Burada bank və lizinq kreditləri, kommunal, mobil, kabel tv, internet ödənişini etmək mümkündür. Hesab.az portalında həm də onlayn sığorta xidmətləri və kinoteatra bilet almaq olar. İstifadəçilərə “Şəxsi kabinet” yaratmaq, ödənişlərin tarixçəsini aparmaq və bonuslar qazanaraq müxtəlif hədiyyələr üzrə hərraclarda iştirak etmək və ya dərhal hədiyyələrə dəyişmək imkanı təqdim edilir. Hesab.az portalı beynəlxalq elektron təhlükəsizlik standartlarına cavab verən müasir texniki infrastruktura malikdir. Hər ay 15 mln. manatdan çox və 100 minlərlə əməliyyat bu portal vasitəsi ilə həyata keçirilir. Həmçinin, portalın iOS, Android və Windows platformalarında tətbiqləri də mövcuddur.
