Baki, Finance Time. “Bakı Fond Birjası” QSC Bilik Mübadiləsi proqramı çərçivəsində tələbələrin qiymətli kağızlar bazarına marağının artırılması və savadlı kadrların yetişdirilməsini təşviq məqsədi ilə ADİU tələbələri arasında “GƏNC İNVESTOR” adlı müsabiqə elan edir.
Müsabiqə real biznes keysin təhlili üzərində qurulmuşdur və tələbələrdən maliyyə vəziyyəti ilə əlaqədar çətinliklə üzləşən böyük bir şirkətin qiymətli kağızlar bazarı vasitəsilə maliyyələşməsi probleminə həll yolu təklif etməyi tələb edir.
Müsabiqəyə ADİU-nin bütün fakültələrinin 2-ci, 3-cü və 4-cü kurslarında təhsil alan tələbələri qoşula bilər. Müsabiqənin mükafat fondu 1500 manat təşkil edir. Qalib iştirakçıları pul mükafatı və digər hədiyyələr gözləyir. Bundan başqa, müsabiqə iştirakçıları verilmiş tapşırıqların həlli zamanı müasir biznes mühitində mühüm billik və bacarıqlar qazanma imkanı əldə edirlər.
Müsabiqəyə qoşulmaq istəyən tələbələr verilmiş biznes keys üzrə tapşırığı analiz etməli və təhlilin nəticəsi olaraq BFB-yə yazılı esse təqdim etməlidirlər. Esseler peşəkar mütəxəssislərdən ibarət münsiflər heyəti tərəfindən qiymətləndiriləcəkdir.
Müsabiqədə iştirak etməyə iddialı olan tələbələr education@bse.az ünvanına email yazaraq (ad, soyad, ata adı, fakultə, ixtisas, kurs, əlaqə nömrəsi göstərilməklə) qeydiyyatdan keçə bilərlər.
Müsabiqə barədə daha ətraflı məlumat BFB-nin internet saytının www.bfb.az/musabiqe bölməsində və mütəmadi yenilənən Bakı Fond Birjası facebook səhifəsində yerləşdirlmişdir.
