Mütəşəkkil bazarda bağlanılan əqdlər üzrə qiymətin formalaşması prosesinin şəffaflığının artırılması və ticarət zamanı sağlam rəqabət mühitinin formalaşdırılması istiqamətində görülən işlərin davamı olaraq, “Bakı Fond Birjası” QSC tərəfindən “Bakı Fond Birjasında Kross əqdlərin bağlanılması qaydaları”na dəyişiklik edilmişdir.
Belə ki, qaydalara edilmiş dəyişikliklərə əsasən, kross sifarişlərin bazar iştirakçılarına açıqlanması üçün nəzərədə tutulmuş 30 (otuz) dəqiqə gözləmə müddəti dəyişdirilərək 60 (altmış) dəqiqə müəyyən edilmişdir.
Bu müddət ərzində bazar iştirakçıları kross sifarişləri təqdim etmiş birja üzvündən daha rədabətli qiymət təklifləri ilə ticarətdə iştirak edə bilərlər.
Qeyd edək ki, kross əqd Birja üzvünün eyni bir əqd üzrə həm alıcı, həm də satıcı qismində çıxış etdiyi əqdlərdir. Yenilənmiş qaydalar 10 fevral 2015-ci il tarixindən etibarən qüvvəyə minir.
Yenilənmiş qaydalar BFB-nin veb saytının (www.bfb.az) “BFB-nin təlimat və qaydaları” bölməsində yerləşdirilmişdir.