Baki, Finance Time. 29 dekabr 2014-cü il tarixində birja üzvlərinin “Bakı Fond Birjasının üzvlərinin səlahiyyətli treyderlərinin ticarətdə iştirakı üzrə akkreditasiyası" qaydalarına uyğun olaraq akkreditasiyadan keçmiş səlahiyyətli treyderlərinə Akkreditə şəhadətnaməsinin təqdim edilməsi mərasimi təşkil olunmuşdur. Tədbirdə BFB-nin 14 üzvünün ümumilikdə 29 səlahiyyətli treyderinə müvafiq şəhadətnamə təqdim edilmişdir.
Tədbiri giriş sözü ilə açan BFB-nin İdarə Heyətinin sədri cənab Fariz Əzizov imtahanlarda müvəfəqqiyyətlə iştirak etmiş və birja üzvünün adından BFB-də ticarətdə iştirak etmək hüququ verilmiş səlahiyyətli treyderləri təbrik etmişdir. Daha sonra “Səlahiyyətli Treyderlərin Akkreditasiya işinin təşkili” layihəsinin iştirakçıları Təşəkkürnamələr ilə təltif olunmuşlar.
Qeyd edək ki, “Bakı Fond Birjasının üzvlərinin səlahiyyətli treyderlərinin ticarətdə iştirakı üzrə akkreditasiyası" qaydalarının tətbiqindən irəli gələrək, 1 yanvar 2015-ci il tarixindən etibarən yalnız attestasiyadan keçmiş və Akkreditə şəhadətnaməsi almış şəxlər bu şəhatdətnamənin qüvvədə olduğu müddət ərzində BFB-də Birja üzvlərinin adından səlahiyyətli treyder olmaq hüququnu əldə edir.
BFB-də treyderlərin attestasiyasının məqsədi, birja üzvü adından birjada ticarətdə iştirak edəcək şəxslərin bilik və bacarıqlarının müvafiq funksiyalara uyğunluğunu müəyyən etmək, o cümlədən səlahiyyətli treyderlərin BFB-də ticarətdə iştirakı üçün zəruri nəzəri və praktiki biliklərin qiymətləndirilməsidir.
Beləliklə, 2014-cü 26 dekabr tarixinə Bakı Fond Birjasının 14 üzvünün ümumilikdə 29 treyderi akkreditasiyadan keçmiş və onlara birja üzvünün adından BFB-də ticarətdə iştirak etmək hüququ verilmişdir.
Məlumat verək ki, bu məqsədlərlə daha öncə Kapital Bazarı üzrə Təlim Mərkəzi və Bakı Fond Birjasının birgə təşkilatçılığı ilə birja üzvlərinin səlahiyyətli treyderləri üçün"Bakı Fond Birjasında ticarət əməliyyatarında iştirak" üzrə təlimlərə start verilmişdir.
